Կալանավորվել են կրթության բաժնի պետն ու 2 տնօրեն

Կաշառք տալու և ստանալու դեպքերի առթիվ Հակակոռուպցիոն կոմիտեում նախաձեռնված քրեական վարույթի շրջանակում նախօրեին ձերբակալված անձանցից 3-ի, այդ թվում՝ Գեղարքունիքի մարզպետի աշխատակազմի համապատասխան վարչության պետի և դպրոցի տնօրեններից մեկի նկատմամբ որպես խափանման միջոց է կիրառվել կալանքը, ևս մեկի նկատմամբ՝ տնային կալանքը: Մնացած մեղադրյալների նկատմամբ կիրառվել են այլընտրանքային խափանման միջոցներ: mediaforedu.am-ին հայտնեց Հակակոռուպցիոն կոմիտեի մամուլի խոսնակ Մարինա Օհանջանյանը։

Երեկ հայտնի էր դարձել, որ կաշառք տալու և ստանալու դեպքերի առթիվ Հայաստանի հակակոռուպցիոն կոմիտեի նախաձեռնած քրեական վարույթի շրջանակում սեպտեմբերի 8-ին ձերբակալվել են Գեղարքունիքի մարզի դպրոցների տնօրեններ, նաև՝ մարզպետի աշխատակազմի համապատասխան վարչության պետը։

Մարզպետի աշխատակազմի Կրթության, մշակույթի և սպորտի վարչության պետ Կարեն Զազյանը մեղադրվում է մի խումբ անձանց, այդ թվում՝ դպրոցների տնօրենների օգտին հովանավորչության և թողտվության դիմաց մի քանի դրվագով կաշառք ստանալու մեջ:

Մինչև 2026 թվականի սեպտեմբերի 1-ը մարզպետներն ունեին իրենց ենթակայության դպրոցների կառավարման որոշ լիազորություններ։ Այդ լիազորությունների իրավական հիմքը 2002 թվականի հուլիսի 25-ի N 1392-Ն որոշումն էր։ 2026 թվականի սեպտեմբերի 1-ից մարզպետարանների ենթակայությամբ գործող պետական դպրոցների հիմնադրի լիազորությունները փոխանցվել են կրթության պետական կառավարման լիազորված պետական մարմնին։