Լուսանկարը՝ Կարինե Սիմոնյանի անձնական արխիվից
Այսօր Մամուլի միջազգային օրվա առիթով կլսենք ու կկարդանք պաշտոնյաների շատ ու շատ դատարկ շնորհավորանքներ։ Կլսենք ու կկարդանք խոսքեր ու շարադրանքներ նրա մասին, թե որքան կարևոր է մամուլը, ինչ հզոր ուժ է ու ինչեր կարող է փոխել հանրության կյանքում։ Լրագրողներն էլ որքան կարևոր դեր ունեն պետության կայացման գործում…
Ամեն ինչ կլսենք, բացի կոնկրետ հարցերի պատասխաններից՝ ով է «Մեդիան հանուն կրթության» ՀԿ համահիմնադիր, «Ազատություն» ռ/կ թղթակից Կարինե Սիմոնյանի բնակարանից բացառապես նրա աշխատանքային տեսախցիկի գողը, ինչու է գողացել, որն էր մամուլի ազատությամբ տարված ու շատ դեպքերում իր անվտանգության մասին մոռացող լրագրողի աշխատանքային գործիքը գողանալու իրական պատճառը։
Եթե այս հարցերը պատասխան չունեն, ի՞նչ իմաստ ունի մամուլի ազատության մասին խոսելը։
Եթե 2018 թ.-ից հետո, երբ ոստիկանական համազգեստով անձինք դեռ լրագրողների են քարշ տալիս, պաշտոնյաներն անհարգալից տոնով են շփվում լրագրողների հետ, խոչընդոտում մամուլի ազատության իրացումը, ի՞նչ շնորհավորանքի մասին է խոսքը։
