Լուսանկարը՝ ԵՊՀ-ի
Չինաստանի Հեյհեյի քոլեջի և Հարբինի տեխնոլոգիական ինստիտուտի շրջանավարտներ Դայ Ռուբինգը և Քսու Ջայքսուն իրենց ուսումնառությունը շարունակում են ԵՊՀ-ում. նրանք այժմ «Հայագիտություն» մագիստրոսական կրթական ծրագրի առաջին կուրսի ուսանողներ են: Տեղեկացնում է ԵՊՀ կայքը։
Ըստ կայքի, կրթությունը շարունակելով ԵՊՀ-ում՝ չինացի ուսանողները մանրամասն կուսումնասիրեն հայագիտության բաղկացուցիչ գիտակարգերը և կնպաստեն հայ-չինական գիտակրթական ու մշակութային կապերի ամրապնդմանը։
Համալսարանում չինացի ուսանողները սովորում են ՀՀ ԿԳՄՍՆ և ՉԺՀ կրթության նախարարության միջև կնքված համաձայնագրի շրջանակում:
Նախքան մագիստրատուրա ընդունվելը չինացի ուսանողները ԵՊՀ-ում անցնում են հայերենի նախապատրաստական դասընթացներ, իսկ ընդունվելուց հետո՝ խորացված գիտելիքներ ստանում նաև արդի հայերենից, գրաբարից, արևմտահայերենից:
