Իրանի խորհրդարանի փոխխոսնակ Ալի Նիկզադը հայտարարել է, որ դպրոցների ավարտական քննությունները կանցկացվեն պատերազմի ավարտից 15 օր անց, իսկ համալսարանների ընդունելության ազգային քննությունը հրադադարից 45 օր հետո։ Սակայն ԱՄՆ նախագահի հայտարարած «անորոշ ժամկետով զինադադարի» ֆոնին դեռ պարզ չէ, թե երբ կհայտարարվի պատերազմի պաշտոնական ավարտը և երբ կվերսկսվի ուսումնական տարին։

Իրանի դպրոցները գործում են հեռավար ռեժիմով։ Ապրիլի 27-ին Կրթության նախարարության հասարակայնության հետ կապերի բաժինը հայտնել է, որ առայժմ ծրագրեր չկան դասերը դեմ առ դեմ ձևաչափով վերսկսելու վերաբերյալ։ Նախարարությունը նշել է, որ «դպրոցների աշխատանքի ցանկացած փոփոխություն կախված է համապատասխան մարմիններից անհրաժեշտ թույլտվություններ ստանալուց»։

Փետրվարի 28-ից, երբ ԱՄՆ-ն և Իսրայելը հարվածներ են հասցրել Իրանին, երկրում կրթությունն ամբողջությամբ անցել է առցանց տարբերակի։ Սակայն ինտերնետի խափանումների և վիրտուալ դասարաններին հասանելիության սահմանափակման պատճառով շատ շրջաններում ուսումնառությունը գրեթե դադարեցվել է։ Հատկապես անապահով շրջանների աշակերտները նկատելի նահանջ են արձանագրում։

Ուսուցիչներն ու ծնողները, իրանական լրատվամիջոցնեի փոխանցմամբ, նշում են, որ այս պլատֆորմը չի կարողացել փոխարինել ավանդական դասերին՝ տեխնիկական խափանումների, հաճախակի անջատումների և ուսուցիչ – աշակերտ հաղորդակցության թույլ մակարդակի պատճառով։

Անկայուն ինտերնետը էլ ավելի է վատթարացրել իրավիճակը՝ փաստացի ուսումնառությունից դուրս մղելով աշակերտների զգալի մասին։ Այս ամենը սպառնում է խորացնել կրթական անհավասարությունը։