«Մասնագիտական զարգացումն ու վարձատրության բարձրացումը մեր կայուն ու հետևողական քաղաքականությունն են, որի արդյունքում 9602 ուսուցիչ կամ մեր ուսուցիչների 31 %-ն արդեն իսկ հաջողությամբ հաղթահարել է կամավոր ատեստավորումը և բարձր վարձատրություն է ստանում»,– այսօր ՀՀ կառավարության նիստի ժամանակ հայտարարել է ՀՀ ԿԳՄՍ նախարար Ժաննա Անդրեասյանը։

ՀՀ կառավարության 2023 թվականի մարտի 16-ի N 351-Լ որոշման հավելված 1-ի մեջ նշված են նաև հանրակրթական հիմնական ծրագրերի վերաբերյալ նախատեսված քայլերը։

Մասնավորապես, հավելվածի 1․2․1 կետով սահմանված է, որ «Կամավոր ատեստավորման արդյունքում հանրակրթական դպրոցի հավելավճար ստացող ուսուցիչների մասնաբաժինը» 2026 թ.- ին պետք է հասներ 63 % – ի։ Սակայն, ինչպես այսօր հայտարարեց նախարարը, հասել է 31 %–ի։ Դեռ։ Իսկ 31 % –ը, ինչպես երևում է պատկերում, նախատեսվում էր ապահովել 2024 թ․–ին։

Կառավարության նիստի ժամանակ ո՛չ փոխվարչապետ Մհեր Գրիգորյանը, ո՛չ էլ գործադիրի ու պետական այլ (վերահսկող) մարմինների որևէ այլ ներկայացուցիչ չպատկերացրե՞ց, որ կարելի է հարցնել՝ ինչո՞ւ է այս ցուցանիշը կիսով չափ պակաս։

2025 թ․ ապրիլին mediaforedu.am-ը առիթ ունեցել է ՀՀ ԿԳՄՍ փոխնախարար Արաքսյա Սվաջյանին հարցնել, թե ինչո՞ւ է ատեստավորման ցուցանիշը մնացել 20 %-ի սահմաններում, եթե նախարարի 2021 թ. հրամանով նախատեսված էր, որ 2025–ին արդեն 50 %-ը պետք է ատեստավորված լիներ և ստանար հավելավճար։ Փոխնախարարը պատասխանել էր․ «Ինչ վերաբերում է կամավոր ատեստավորման ցուցանիշներին, ապա՝ այո, կրթության ռազմավարության գործողությունների պլանում թիրախները, որոնք պլանավորված էին 2023 թվականի համար, մենք լիարժեք չենք իրականացրել և հաշվետվության մեջ դրանք նշել ենք որպես թերի կատարված»։

ՀՀ կառավարության 2023 թվականի մարտի 16-ի N 351-Լ որոշումը դեռ ուժի մեջ է։ Ուստի, նախորդ փուլերում ատեստավորման շեմը չհաղթահարածներին լրացուցիչ հնարավորություն տալով հանդերձ, առնվազն 31 % արդյունք չնվաճելու դեպքում ՀՀ ԿԳՄՍ համապատասխան հաշվետվության մեջ այս ուղղությամբ ևս պետք է որ նշվի թերակատարում։ Իսկ այս 31 %–ը մինչ այժմ նվաճվել է 2021 թվականից ի վեր՝ դեռ չգերազանցելով 2024 թվականին վերագրված ցուցանիշը։

Անուշ Մարտիրոսյան