Նոր Զելանդիայի կառավարությունը հայտարարել է կրթության ոլորտում ավելի քան 131 միլիոն դոլարի ներդրման մասին, որը նախատեսված է մինչև 10 – րդ դասարանների աշակերտների գրագիտության և մաթեմատիկական կարողությունների զարգացման համար։ Նախաձեռնությունը ներկայացրել են վարչապետ Քիստոֆեր Լյուքսոնը և կրթության նախարար Էրիկա Ստենֆորդը։ Ֆինանսավորումը նախատեսված է առաջիկա 4 տարիների համար և ուղղվելու է մի շարք ծրագրերի իրականացմանը։

Մաթեմատիկայի ուղղությամբ նախատեսվում է 29.7 միլիոն դոլարի ներդրում։ Կստեղծվեն և փորձնական կգործարկվեն մաթեմատիկական կենտրոններ, 0 – 8 – րդ դասարանների համար կտրամադրվեն գործնական մաթեմատիկական ուսուցման պարագաներ, կներդրվի բազմապատկման և բաժանման նոր ստուգման համակարգ, ինչպես նաև դպրոցներում կավելանա 36 լրիվ դրույքով ուսուցիչ՝ հատուկ մաթեմատիկական աջակցություն ապահովելու նպատակով։ Ըստ ծրագրի, ընդլայնվելու է նաև մաթեմատիկական արագացված ուսուցման ծրագիրը, որը կընդգրկի 9 – 10 – րդ դասարանները։

Գրավոր խոսքի զարգացման ուղղությամբ կառավարությունը նախատեսում է ներդնել 38.7 միլիոն դոլար։ Ծրագրի շրջանակում 4 – 5 – րդ դասարանների աշակերտների համար կտրամադրվեն գրավոր աշխատանքի տետրեր, իսկ 6 – 8 – րդ դասարաններում կներդրվի թվային գործիք, որը կօգնի զարգացնել աշակերտների գրավոր խոսքի հմտություններն ու սահունությունը։

Կառուցվածքային գրագիտության ծրագրերի համար նախատեսված է 19.4 միլիոն դոլար։ Ըստ ծրագրի, պետք է ստեղծվեն ընթերցանության հատուկ նյութեր ավելի բարձր դասարանցիների համար, նաև նախատեսվում է իրականացնել 2-րդ դասարանի ավարտական գրագիտության ստուգման, արագացված գրագիտության ծրագրի մշակում։

Մասնագիտական զարգացման համար կհատկացվի ևս 43.5 միլիոն դոլար։ Այդ միջոցները կուղղվեն դպրոցների ղեկավարների և ուսուցիչների վերապատրաստմանը՝ տվյալների ավելի խելամիտ օգտագործման և արդյունավետ, հստակ ուսուցման մեթոդների կիրառման նպատակով։