ՄԲ․ դպրոցը վաղաժամ քննությունների «գործարան» չէ

Մեծ Բրիտանիայում միջնակարգ կրթության ավարտական քննությունների առարկաների վաղ ուսուցումը դպրոցները կվերածի «քննությունների գործարանների»՝ խորացնելով կրթությունից օտարացումը։ The Guardian–ի փոխանցմամբ, հայտարարել է Մեծ Բրիտանիայի կրթության նախարար Լյուսի Փաուելը։

Նախարարն ընդգծել է, որ դպրոցները պետք է դադարեցնեն 9-րդ կամ ավելի ցածր դասարաններում միջնակարգ կրթության ավարտական քննությունների թեմաների ուսուցման տարածված պրակտիկան։ Քննությունների ծրագրերի պաշտոնական ուսուցումը սկսվում է 10-րդ դասարանում։

Նախարարը տեղեկացրել է, որ նախատեսում է կրճատել քննությունների բովանդակությունը՝ այն երկու ուսումնական տարվա՝ 10-րդ և 11-րդ դասարանների ընթացքում տեղավորելու համար։

Լյուսի Փաուելի խոսքով, առաջարկները ներառվելու են հանրակրթական ազգային ուսումնական ծրագրի վերանայման մեջ, որը նախատեսվում է հրապարակել 2027 թվականի սկզբին։

Ըստ Մեծ Բրիտանիայի կրթության նախարարի, միջնակարգ դպրոցի առաջին տարիները պետք է լինեն այն ժամանակահատվածը, երբ երեխաները հաճույքով են դպրոց հաճախում, ներգրավվում մասնագիտացված և ավելի լայն կրթական ծրագրերում, բացահայտում իրենց հետաքրքրությունները և զարգացնում սովորելու նկատմամբ սերը։

«Փոխարենը՝ մենք տեսնում ենք կրթությունից օտարման մտահոգիչ միտումներ, դպրոցից երկարատև բացակայությունների բարձր մակարդակ, սոցիալական անհավասարության պահպանվող մեծ տարբերություն, ինչպես նաև դպրոցն առանց անհրաժեշտ գիտելիքների և հմտությունների ավարտող չափազանց շատ աշակերտներ», — ասել է նախարարը։

Նա բացատրել է, որ միջնակարգ կրթության ավարտական քննությունների պատճառով գերծանրաբեռնված ուսումնական ծրագիրը հանգեցնում է երեխաների սահմանափակ կրթությանը։ Այսպիսով, ըստ նախարարի, երեխաները շտապում քննությունների՝ առանց հիմնարար գիտելիքները յուրացնելու կամ խորքային ըմբռնում զարգացնելու։