Նիդերլանդների ուսուցչական միավորումը հայտարարել է արհեստական բանականության կիրառման ուղեցույցի կարիքի մասին։ Տեղեկացնում է DutchNews կայքը: Ուղեցույցի կարիքի հիմքում արհեստական բանականության վերաբերյալ բավարար ու գրագետ տեղեկացվածության պակասն է։

Նիդերլանդների վիճակագրության բյուրոյի տվյալներով, 12 տարեկանից բարձր անձանց 23 տոկոսը կիրառում է ChatGPT կամ նման ծրագրեր։ Այս իրավիճակն, ըստ պարբերականի, ուսուցիչների համար ստեղծում է խնդիրներ։

Ամստերդամի համալսարանի ուսումնասիրություններով, անցյալ տարի 16-24 տարեկանների 74 տոկոսը կիրառել է արհեստական բանականություն։ Իսկ 25-ից բարձր տարիքի անձանց 74 տոկոսը երբեք չի փորձել կիրառել արհեստական բանականություն։

Նիդերլանդների ուսուցչական միավորման փոխնախագահ Ջելմեր Էվերսն ասել է, որ արհեստական բանականության գործիքները ուսուցիչների համար կարևոր են երեխաներին դրանց բացասական ազդեցություններից զերծ պահելու նկատառմամբ: Ուսուցիչները բավարար չեն համարում հետազոտությունները, թե արհեստական բանականությունը որքանով է վտանգում երեխաների՝ ինքնուրույն սովորելու կարողությունը: Հենց դրա համար էլ, ըստ Էվերսի, անհրաժեշտ է տիրապետել թվային էթիկայի կանոններին:

Նիդերլանդների կրթության փոխնախարարը հայտարարել է, որ արհեստական բանականությունը կարող է վնասել կրթությանը: Նա կոչ է արել պատշաճ մոտեցում դրսևորել թվային գրագիտության հարցերին: