«Պետք է մտածել և գալ այդ գիտակցությանը, որ պարով կարող է շատ ավելի մեծ բաներ դաստիարակել ապագա սերունդի մեջ, քան ցանկացած այլ առարկայի միջոցով»,- Լիլիթ Հարությունյանի հետ զրույցում ասել է Հայկական պետական մանկավարժական համալսարանի պարարվեստի մանկավարժության և դասավանդման մեթոդիկայի ամբիոնի դոցենտ, պարուսույց Սուրեն Խաչատրյանը:

Ըստ հանրահայտ պարուսույցի, հայկական պարը մեր գենետիկայի հետ է կապված. «Գենետիկայի հետ կապված հարցեր են, ներքին տեմպոռիթմի, մեր մտածողության հետ կապված հարցեր են, որոնք պարի միջոցով գտնվում են ներդաշնակության մեջ և դրանք այսպես բաց թողնել, բացառել, չգիտակցել և չհասկանալ, մտածել ֆինանսավորում լինի՞, թե՞ չլինի՝ այդքան էլ տեղին չի, ճիշտ ուղղությամբ չենք մտածում։ Բնականաբար, եթե ֆինանսավորում չկա, ինչպե՞ս խոսենք պրոցոսի մասին»:

Հանրակրթական դպրոցներում 2024 թվականից է դադարեցվել ազգային երգուպար առարկայի ներդրման ֆինանսավորումը:

«Ազգային երգ ու պար» առարկան դասավանդվում էր 5-րդ, 6-րդ, 7-րդ դասարաններում։

Պետական բյուջեի մասին մինչև 2023 թվականի իրավական ակտերում որպես առարկայի ներդրման նպատակ նշված է՝ մշակույթի պահպանում, հանրայնացում, պարուսուցման ոլորտի համակարգված գործունեության ապահովում, սովորողների ազգային ոգու ամրապնդում։

Էլենա Հարությունյան