Մեծ Բրիտանիայի պետական ավագ դպրոցներում ստեղծվել են ակումբներ, որտեղ աշակերտները ներգրավվում են քննարկումների մեջ։ Նպատակն է երեխաների բանավոր խոսքի ու կենսական կարևոր հարցերում արտահայտվելու հմտության զարգացումը։ Կառավարությունը բանավոր խոսքի հմտությունը որակել է առաջնահերթություն։ Հայտնում է The Guardian-ը։

Բրիտանական հեղինակավոր պարբերականին փոխանցված «Կյանքի դասեր-24» զեկույցի համաձայն, ուսուցիչների 96 տոկոսն ասել է, որ կենսական հմտությունները ավելի կարևոր կամ շատ ավելի կարևոր են, քան ակադեմիական, ֆորմալ կրթությունը։ Հարցումներին մասնակից պետական դպրոցների ուսուցիչների կեսն ասել է, որ դպրոցը չի տալիս բավարար հնարավորություններ երեխաներին կյանքում ամենաշատն անհրաժեշտ հմտությունները յուրացնելու նպատակով։

Ուսուցիչները դժգոհել են, որ պետական դպրոցները հնարավորություն չեն տալիս ոչ ֆորմալ կրթության միջոցով երեխաների կենսական հմտությունների զարգացմանը։ Եթե այս դժգոհությունն առկա է մասնավոր դպրոցի 5 ուսուցչից մեկի պատասխանում, ապա պետական դպրոցի 10 ուսուցչից 5-ն է դժգոհում անհրաժեշտ պայմանների բացակայությունից։

Կառավարությունը հռետորական խոսքի զարգացման նպատակով 52,747 ֆունտ ստեռլինգի փոխարեն այս տարի հատկացրել է 63.000 ֆունտ ստեռլինգ. հիմնավորումն այն է, որ դարերի ընթացքում մասնավորապես Բերքշիրի դպրոցը, որի համար հանրային խոսքի արվեստն առաջնահերթություն է, բրիտանացիներին տվել է ավելի քան 20 վարչապետ։