120 երկիր ստորագրել է ապահով դպրոցների պաշտպանության հայտարարագիրը, սակայն, ցավոք, ԱՄՆ կառավարությունը դեռ դրանց մեջ չէ: Այս շեշտադրմամբ այսօր հրապարակված հոդվածում նկատում է Human Rights Watch միջազգային իրավապաշտպան կազմակերպության երեխաների իրավունքների պաշտպանության հարցերով գործադիր տնօրեն Զամա Նեֆֆը:

Հայտարարագիրը ստորագրած երկրները պարտավորվել են անգամ պատերազմական իրավիճակներում ապահովել երեխաների կրթության իրավունքի իրացումը:

Աշխարհի տարբեր ծայրերի դպրոցներում որոտացող պայթյունների դեմ միահամուռ պայքարի կարևորությունն ընդգծելով՝ նա վկայակոչում է Աֆղանստանի դպրոցում 20 տարի առաջ տեսածը. երեխան հայացքով փնտրում էր իրենց դասարանում հայտնված պայթուցիկ սարքի աղբյուրը, իսկ ուսուցիչը պնդում էր, որ անգամ այդ դեպքում չի հրաժարվի մարտահրավերից ու կշարունակի կրթությունը:

Հեղինակը գրում է, որ 2005-ին կարծում էր, թե դպրոցները ռազմական գործողությունների թիրախ դարձնելը Աֆղանստանի խնդիրն է: Սակայն հետազոտությամբ պարզվել է՝ դա այսօր ամենուր է՝ Ուկրաինայում, Գազայում… Շատ հաճախ դպրոցները դառնում են ռազմական նպատակներով օգտագործվող տարածք:

Նկատի ունենալով այս հանգամանքը՝ ավելի քան 10 երկիր խստացրել է նաև ներքին օրենսդրությունը դպրոցների պաշտպանության վերաբերյալ: Այդ երկրների թվում են Դանիան, Էկվադորը, Նոր Զելանդիան, Նորվեգիան, Իսպանիան, Միացյալ թագավորությունը: Human Rights Watch-ի ներկայացուցիչը՝ վերլուծելով ԱՄՆ իրավաբանների բացատրությունը, թե ներպետական օրենսդրական ակտերով դպրոցները պաշտպանության տակ են, պնդում է, որ ԱՄՆ-ը պետք է միանա հայտարարագրին՝ ավելացնելով կրթության միջազգային ֆոնդը: