Լուսանկարը՝ ՀՀ կրթության տեսչական մարմնի պաշտոնական կայքից
ՀՀ կրթության տեսչական մարմինը հայտնում է, որ Երևանի N դպրոցում հայտարարված «Պատմություն» առարկայի ուսուցչի թափուր տեղի մրցույթին մասնակցած քաղաքացու դիմումի հիման վրա ՀՀ կրթության տեսչական մարմինը հարուցել է վարչական վարույթ:
Արձանագրվել է, որ մրցույթն անցկացվել է ընթացակարգային նորմերի խախտումներով, արդյունքում՝ մրցույթի մասնակից քաղաքացու իրավունքները ճանաչվել են խախտված։
Ըստ տեսչաան մարմնի՝ հարցազրույցի փուլի համար նախատեսված հարցաշարի ոչ բոլոր հարցերն են ուղղված եղել մասնակիցների մանկավարժական և ուսումնամեթոդական գիտելիքների, կարողությունների և հմտությունների բացահայտմանը։
«Հարցազրույցի փուլում մրցույթին մասնակցած քաղաքացին հարցատոմսի հարցին տվել է ճիշտ պատասխան, սակայն սխալ մեկնաբանություն:
Մրցութային հանձնաժողովի անդամները նրա տված ճիշտ պատասխանը դիտարկել են որպես թերի պատասխան և գնահատել մեկ միավոր (առավելագույն՝ 2 միավորի փոխարեն)«»,- մանրամասնում է տեսչական մարմինը և վկայակոչում մեկ այլ խախտում, ըստ որի՝ մրցույթի հարցազրույցի փուլը սկսվել է թեստավորման արդյունքները հայտարարելուց հետո, իսկ արդյունքները հայտարարվել են թեստային աշխատանքները ստուգելուց անմիջապես հետո։
Մրցույթի արդյունքները ճանաչվել են անվավեր, ըստ այդմ՝ լուծվել է մրցույթի արդյունքում հաղթող ճանաչված քաղաքացու հետ կնքված աշխատանքային պայմանագիրը և հայտարարվել է մրցույթ՝ տվյալ առարկայի ուսուցչի թափուր տեղի համար։
Օրենսդրության պահանջների խախտումները ենթակա են սահմանված կարգով վերացման:
