«ՀՀ կառավարության 2022 թ. Ապրիլի 28-ի N 596-Ն որոշման մեջ փոփոխություններ և լրացումներ կատարելու մասին» որոշման նախագծի հիմնավորման տեքստում նշված է, որ այն «նպատակ ունի կարգավորելու ուսուցչի կամավոր ատեստավորման գործընթացի կազմակերպման և իրականացման ընթացքում ի հայտ եկած խնդիրները, բացառել գործընթացի կազմակերպման և իրականացման ընթացքում ծագած խնդրահարույց հարցերն ու դրանց ոչ միանշանակ հետևանքները, որոշ դրույթների վերանայման և լրացման արդյունքում ունենալ կամավոր ատեստավորման գործընթացի ավելի կանոնակարգված, պարզ ու թափանցիկ կազմակերպում և իրականացում»:

Ըստ հիմնավորման տեքստի, «Նախագծի մշակումը պայմանավորված է էլեկտրոնային թեստավորման եղանակով ատեստավորում իրականացնելու համար ընթացակարգի նկարագրութունը ներառելու, գործընթացն առավել ժամանակակից մոտեցումներով, ինչպես նաև ստացված բավարար քանակի դիմումների առկայության դեպքում նույն տարում կրկնակի ատեստավորում կազմակերպելու հնարավորություն ստեղծելու, ատեստավորումն ավելի թափանցիկ, կողմնակի ազդեցություններից զերծ պահելու անհրաժեշտությամբ»:

Նախագծով նախատեսվում է, որ կամավոր ատեստավորմանը կարող են մասնակցել «Հանրակրթության մասին» օրենքի 38-րդ հոդվածի 5-րդ մասի պահանջով մասնագիտական գործունեությունը դադարեցված բարձրագույն կրթություն չունեցող անձինք: Ատեստավորումը հաջողությամբ անցնելուց հետո տվյալ անձինք հնարավորություն կստանան մասնակցելու ուսուցչի թափուր տեղի համար անցկացվող մրցույթներին:

«Կարևոր փոփոխություն է նաև ատեստավորումն էլեկտրոնային եղանակով անցկացնելը, չնայած, որ նախագծում պահպանված է նաև թղթային եղանակով ատեստավորումն անցկացնելու կարգը՝ հաշվի առնելով անհաղթահարելի ուժի ազդեցությամբ հնարավոր խոչըդոդների առաջացման ռիսկը»,- նշված է հիմնավորման տեքստում:

«Մեդիան հանուն կրթության» ՀԿ համահիմնաիր Նելլի Հայրապետյանը հատուկ ուշադրություն է հրավիրում թեստերի բովանդակությունը բարելավելու վրա, մնացածն, ըստ փորձագետի, երկրորդական է:

Նախագծի վերաբերյալ կարծիքներ հայտնելու վերջնաժամկետը հուլիսի 30-ն է: Այս պահի դրությամբ նախագծին կողմ է 62 տոկոսը: