Մեծ Բրիտանիայի լեզվաբանական երեք առաջատար մասնագիտական կազմակերպություններ մտահոգություն են հայտնել Էքսեթերի համալսարանի՝ շուրջ 150 աշխատատեղ կրճատելու ծրագրի կապակցությամբ՝ նշելով, որ այն կարող է բացասաբար անդրադառնալ հումանիտար և օտար լեզուների կրթության զարգացման վրա։

Թարգմանիչների ինստիտուտի, Թարգմանչական ընկերությունների ասոցիացիայի և Լեզվաբանների թագավորական ինստիտուտի ղեկավարները նշում են, որ լեզուների բաժինների փակումը միայն համալսարանների խնդիր չէ։ Նրանց գնահատմամբ՝ դրա հետևանքով նվազում է նաև ապագա ուսուցիչների պատրաստումը, սահմանափակվում են դպրոցներում օտար լեզուների ուսուցման հնարավորությունները, իսկ բարձրագույն կրթությունում լեզուների մասնագիտություններ ընտրող ուսանողների թիվը շարունակում է նվազել։ Ամենամեծ ազդեցությունը, ըստ մասնագետների, կրում են մարզային բուհերում սովորող և սոցիալապես անապահով ընտանիքների երիտասարդները։

The Guardian-ի հրապարակման համաձայն՝ մասնագետները հիշեցնում են նաև այս խնդրի տնտեսական հետևանքների մասին։ Հետազոտությունների տվյալներով՝ օտար լեզուների իմացության պակասը Միացյալ Թագավորության տնտեսությանը տարեկան արժենում է համախառն ներքին արդյունքի (ՀՆԱ) մոտ 3.5%-ը՝ հիմնականում արտահանման հնարավորությունների կորստի պատճառով։ Բացի այդ, գործատուների շուրջ մեկ երրորդը նշում է, որ դժվարանում է համալրել աշխատատեղերը լեզվական հմտություններ ունեցող մասնագետների պակասի պատճառով։ Միաժամանակ, օտար լեզուների իմացությամբ աշխատակիցներ ունեցող փոքր և միջին ձեռնարկությունները արտահանման ոլորտում 30%-ով ավելի հաջող արդյունքներ են գրանցում։

Լեզվաբանական երեք կազմակերպությունները համալսարանների ղեկավարներին են ներկայացրել «Լեզուների ռազմավարական նշանակությունը Մեծ Բրիտանիայի բարձրագույն կրթությունում» զեկույցը՝ առաջարկելով լեզուների ուսուցումը դիտարկել որպես երկարաժամկետ ներդրում երկրի կրթական և տնտեսական զարգացման համար, այլ ոչ թե ֆինանսական բեռ։ Սակայն, նրանց խոսքով, բուհերի մեծ մասը դեռևս չի արձագանքել այդ առաջարկներին։

Քննարկմանը միացել է նաև խորհրդարանի Ժամանակակից լեզուների հարցերով համակուսակցական խմբի նախագահ, պատգամավոր Դարեն Փաֆին։ Նա հայտարարել է, որ օտար լեզուների կրթության հնարավորությունների սահմանափակումը կարող է բացասաբար անդրադառնալ երիտասարդների սոցիալական առաջընթացի և աշխատաշուկայում մրցունակ լինելու հնարավորությունների վրա։ Պատգամավորը կառավարությանը կոչ է արել ընդլայնել դպրոցներում օտար լեզուների ուսուցման խրախուսման ծրագրերը, մեծացնել ֆինանսական աջակցությունը լեզուներ ընտրող աշակերտների համար և լրացուցիչ միջոցներ հատկացնել լեզվի կարևորության հիմքով մասնագիտություններին։

Փորձագետների գնահատմամբ՝ եթե օտար լեզուների կրթության նկատմամբ ներկայիս քաղաքականությունը չվերանայվի, Միացյալ Թագավորությունը կարող է աստիճանաբար կորցնել բազմալեզու միջավայրում արդյունավետ գործելու իր կարողությունը, ինչը կազդի ոչ միայն կրթության, այլև երկրի տնտեսական և միջազգային համագործակցության հնարավորությունների վրա։