PISA 2025․ Պերուի կրթությունը՝ ազգային գործ

«Ուսուցումը ազգային գործ դարձնելը PISA 2025-ի ամենակարևոր արձագանքը կլինի։ Խնդիրը միջազգային վարկանիշում զբաղեցրած տեղը չէ, այլ երկրի կարողությունը՝ կրթելու քաղաքացիների, որոնք կկարողանան հասկանալ աշխարհը, ինքնուրույն մտածել, ձևավորել իրենց ապագան և հոգ տանել մեր ընդհանուր տան մասին»։ Այսպես է PISA 2025-ի արդյունքներին արձագանքել Պերուում ՅՈՒՆԵՍԿՕ-ի ներկայացուցիչ Գիոմար Ալոնսոն։

Պերուում աշակերտների միայն 42 % – ն է հասնում PISA-ի՝ ընթերցանության 2 –րդ կամ ավելի բարձր մակարդակի, բնագիտությունից՝ 47 % – ը, իսկ մաթեմատիկայից՝ ընդամենը 30 % – ը։ Այս թվերի հետևում երիտասարդներ են, որոնք դժվարանում են հասկանալ իրենց կարդացածը, կապեր գտնել գաղափարների միջև, գնահատել տեղեկությունը և լուծել խնդիրներ։

Մանկավարժության դերը

Ալոնսոյի խոսքով՝ Պերուի արձագանքը պետք է առաջին հերթին լինի մանկավարժական, իսկ դրա հիմքում՝ հավասարությունը։ «Ոչ մի թվային գործիք չի կարող փոխարինել այն ուսուցչին, որը հետաքրքրություն է առաջացնում, սովորեցնում է հարցեր տալ, մարտահրավեր է նետում գաղափարներին և օգնում է աշակերտներին ձևավորել ինքնուրույն դատողություն», — պնդում է Ալոնսոն ՅՈՒՆԵՍԿՕ – ի պաշտոնական հրապարակման մեջ։

Պերուի ներկայացուցչի խոսքով՝ կրթական համակարգը պետք է ապահովի ոչ միայն այն, որ ավելի շատ աշակերտներ սովորեն, այլև որ շատ ավելի մեծ թվով աշակերտներ հասնեն բարձր արդյունքների՝ անկախ նրանց սոցիալական ծագումից, բնակության վայրից կամ ընտանիքի տնտեսական հնարավորություններից։

Կրթության պատասխանատուները

Կրթությունն, ըստ ՅՈՒՆԵՍԿՕ – ի ներկայացուցչի, միայն ոլորտի պատասխանատվությունը չէ։ Դրան պետք է մասնակցեն պետությունը, մարզային և տեղական իշխանությունները, դպրոցները, ուսուցիչները, ընտանիքները, համալսարանները, բիզնեսը, լրատվամիջոցները և քաղաքացիական հասարակությունը։

«Քիչ բաներ կան, որոնք կարող են մեզ այդքան ուժեղ միավորել, որքան յուրաքանչյուր երեխայի և դեռահասի՝ սովորելու հնարավորություն ապահովելու նպատակը», — եզրափակում է ՅՈՒՆԵՍԿՕ – ի ներկայացուցիչը։