«Ուսուցիչների կամավոր ատեստավորման համար ստեղծված էլեկտրոնային համակարգը որևէ տեխնիկական կամ ծրագրային խնդիր չի ունեցել»,- www.mediaforedu.am-ի գրավոր հարցմանն ի պատասխան նշել է Կրթական տեխնոլոգիաների ազգային կենտրոնի (ԿՏԱԿ) տնօրեն Արտակ Պողոսյանը։

ԿՏԱԿ-ին, իսկ ավելի վաղ՝ ԿԳՄՍՆ-ին  առաջին անգամ անցկացված էլեկտրոնային թեստավորման մանրամասների վերաբերյալ հարցեր էինք ուղղել՝ հիմք ընդունելով ՀՀ վարչապետի նախաձեռնած «Գնդակահարության պատին» բողոք գրած ուսուցչի պնդումը, որ չի տեսել առաջադրանքների մի մասը, քանի որ էկրանին հուշում չի եղել, այդպիսով հարցերին չի պատասխանել ոչ թե չիմանալու, այլ դրանց մի մասը չտեսնելու պատճառով: Իսկ թեստից առաջ տեղում հայտարարություն չի եղել, թե քանի հարցի պետք է պատասխանեն ուսուցիչները:

«Կտակը համակարգող (չ)է»

ԿՏԱԿ-ի տնօրենը մեր գրավոր հարցմանն ի պատասխան նշել է, թե «ԿՏԱԿ-ը չի հանդիսանում ուսուցիչների կամավոր ատեստավորման համակարգող և իրականացնող մարմինը, ուստի ուսուցիչներին թեստերի կառուցվածքի և բովանդակության հետ կապված տեղեկատվություն տրամադրելը կառույցի իրավասությունից դուրս է»։

ԿՏԱԿ-ի տնօրենի այս պատասխանը զարմանալի չէր լինի, եթե ոչ միայն պատասխան գրության բովանդակությամբ ամրապնդեր վերը մեջբերվածը, այլև եթե ընդամենը մի քանի օր առաջ ՀՀ ԿԳՄՍ փոխնախարար Արաքսիա Սվաջյանի ստորագրությամբ գրավոր պատասխանի մեջ նշված չլիներ. «Կամավոր ատեստավորման համակարգումն իրականացնում է ԿՏԱԿ-ը…»: Ի դեպ, պատասխանի մեջ թյուրիմացաբար նշված է մեր գործընկերոջ էլ. հասցեն. այն գունավորել ենք՝ անձնական տվյալի պաշտպանության նկատառումներով:

Ավելին, ըստ Արաքսիա Սվաջյանի, ԿՏԱԿ-ը տվել է պարզաբանում, թե համակարգը որևէ տեխնիկական կամ ծրագրային խնդիր չի ունեցել: «Առաջադրանքի կողքին եղել է վահանակ (scroll), որի միջոցով հնարավոր էր տեսնել բոլոր առաջադրանքները»:

Վահանակի առկայության պնդումը գուցե ճշմարտանման թվար, եթե թե՛ Սվաջյանի, թե՛ Պողոսյանի՝ կից ներկայացրած նույն պատկերն իր աչքով տեսած լիներ էլեկտրոնային թեստի կազմակերպման որակից վարչապետի նախաձեռնած «Գնդակահարության պատին» իր դժգոհությունը չհայտնած մեկ այլ ուսուցիչ: Բայց առավել ուշագրավ է հարցը, թե ինչու է ԿԳՄՍՆ-ն գրավոր պատասխանի մեջ նշում, որ «Կամավոր ատեստավորման համակարգումն իրականացնում է ԿՏԱԿ-ը…», իսկ ԿՏԱԿ-ի տնօրենը գրում է. «ԿՏԱԿ-ը չի հանդիսանում ուսուցիչների կամավոր ատեստավորման համակարգող…»:

Բայց այսքանով չի ավարտվում կամավոր (էլեկտրոնային) ատեստավորման ժամանակ ի հայտ եկած խնդիրների շարանը:

Թե՛ ԿԳՄՍՆ-ն, թե՛ ԿՏԱԿ-ը նույն լուսանկարն ուղարկելուց բացի նշում են, թե հրապարակվել էր թեստավորման ուղեցույց, որտեղ նշված է եղել նաև առաջադրանքների քանակը: ԿԳՄՍՆ-ն մեր առաջին հարցմանն ի պատասխան կիսատ գրություն ուղարկելուց հետո ստացել է երկրորդ հարցումը, որով խնդրել ենք հստակ պատասխանել նաև այս հարցերին. «Տրվե՞լ է արդյոք քննական թեստի առաջադրանքների քանակի վերաբերյալ ծանուցում՝ որեւէ հարթակում: Եթե այո՝ խնդրում եմ տեղադրել հղումը»։ Բացի այդ, ակնկալվում է(ր) այս հարցի պատասխանը ևս. «Թեստի՝ «ավարտել» հրահանգին կից եղե՞լ է չկատարված առաջադրանքների մասին ծանուցող գործառույթ, որը հնարավորություն կտար խուսափել ուսուցչի վկայակոչած թյուրիմացությունից»։

Նախարարությունը (հավանաբար) դեռ մտորում է: Իսկ ԿՏԱԿ-ը, որը նշում է, թե չի հանդիսանում ատեստավորման համակարգող, պատասխան գրությամբ հայտնել է. «ԿԳՄՍՆ «Գնահատման և թեստավորման կենտրոն» ՊՈԱԿ-ի կայքում տեղադրված են բոլոր առարկաների թեստերի վերաբերյալ ուղեցույցները, որտեղ հստակ նշված է թեստի կառուցվածքը, ինչպես նաև հարցերի կամ առաջադրանքների քանակը»։

ԿՏԱԿ-ին ուղղված մեր հարցումը ձևակերպված էր այսպես. «ԿՏԱԿ-ը՝ ՀՀ կառավարության 2022 թվականի ապրիլի 28-ի N 596-Ն որոշմամբ հաստատված կարգի պահանջների համաձայն՝ կամավոր ատեստավորումն անցկացնելով էլեկտրոնային թեստավորման եղանակով եւ համակարգելով այն՝ ուսուցիչներին տեղեկացրե՞լ է, թե գրավոր թեստավորման հարցերը քանիսն են: Եթե այո, խնդրում եմ պատասխան գրությամբ ուղարկել հղումը»:

ԿՏԱԿ-ը չի տրամադրել թեստում առաջադրանքների քանակի վերաբերյալ տեսաուղեցույցի հղումը:

ԳԹԿ կայքում չգտանք 2 պետական մարմինների հավաստիացումներով՝ գոյություն ունեցող, բայց այդպես էլ չտրամադրած հղումները: Իսկ դպրոցների սոցիալական էջերում տարածված տեսաուղեցույցում թեստում առաջադրանքների քանակի վերաբերյալ որևէ խոսք չկա: Ուսուցիչները որտեղի՞ց պետք է իմանային թեստում առաջադրանքների քանակի մասին, եթե թեստավորման մեկնարկի ժամանակ տեղում նույնպես որևէ զգուշացում չեն ստացել այս շատ պարզ հարցի վերաբերյալ:

Ի վերջո, հասկանալի է, որ առաջին անգամ անցկացվող էլեկտրոնային թեստավորման խնդիրներն անխուսափելի են: Բայց անհասկանալի է, թե ԿԳՄՍ նախարարության համար ինչու է այդքան բարդ պատասխանել հարցին, թե քանի՞ ուսուցիչ է բողոքել ոչ բոլոր հարցերի՝ տեսանելի լինելուց:

Կարելի էր ընդամենը մարդկայնորեն ընդունել, որ տեղի է ունեցել տեխնիկական բացթողում, նոր հնարավորություն տալ դրա պատճառով խնդրի առջև կանգնած ուսուցիչներին և մյուսների (դեռ չատեստավորվածների) շրջանում էլ հավատ ներշնչել, որ գնահատվում են ոչ թե «մրցանակներով» կամ «պատվոգրերով», այլ մարդու նկատմամբ դրսևորվող պետական քաղաքականության արժանապատիվ մակարդակով:

Անուշ Մարտիրոսյան