ԱՄՆ-ի միջնակարգ դպրոցների ղեկավարների ընդամենը 20%-ն է հաստատել, որ «շատ լավ» ծանոթ է Բարձրորակ ուսումնական նյութերին (HQIM): Մոտ 37%-ը նշել է, որ «շատ քիչ» կամ «ընդհանրապես» ծանոթ չէ արդյունավետ դասավանդումն ապահովելու նպատակով պետական մակարդակով մշակված նյութերին։ Այս տվյալները բացահայտվել են Gallup Math Matters հետազոտությամբ, որն անցկացվել է 2024 թ. դեկտեմբերի 2-9-ը։ Հարցմանը մասնակցել է 1471 կրթական հաստատության ղեկավար։

Gallup-ի հետազոտությամբ պարզվել է, որ մաթեմատիկայի դասավանդման որակը կարող է տուժել նաև ուսուցիչների մասնագիտական զարգացման ոչ բավարար մակարդակից։

Հարցմանը մասնակցած կրթական հաստատությունների ղեկավարների 39%-ը նշել է, որ իրենց դպրոցում կամ շրջանում մաթեմատիկայի ուսուցիչների մասնագիտական զարգացումը «միջին» կամ «վատ» որակի է, 48%-ը գնահատել է այն «լավ», և միայն 11%-ը՝ «գերազանց»։

Բացի այդ, դպրոցների ղեկավարների մոտ 40%-ը կարծում է, որ իրենց ուսուցիչների մասնագիտական զարգացման դասընթացները համահունչ չեն իրենց մաթեմատիկայի ուսումնական ծրագրերին։ Սակայն, նրանք, ովքեր նշել են, որ իրենց մասնագիտական ուսուցումն ամբողջությամբ կամ մեծ մասամբ համապատասխանում է մաթեմատիկայի ծրագրին, 73%-ով ավելի հավանական է, որ այն «լավ» կամ «գերազանց» կգնահատեն, համեմատած նրանց հետ, ովքեր նշում են համատեղելիության բացակայությունը (40%)։