Այսօր Երևանում քննարկվել են TIMSS 2023 հետազոտությանը Հայաստանի մասնակցության տվյալները։ Տեղեկացնում է ԿԳՄՍ նախարարությունը:

TIMSS-ը կրթական արդյունքների չափման միջազգային հետազոտություն է, որը հնարավորություն է տալիս հասկանալու կրթական համակարգի ներկա վիճակը, համեմատելու հաջողություններն այլ երկրների հետ, բացահայտելու խնդիրները։ Հետազոտությունն անցկացվում է 4-րդ և 8-րդ դասարանցիների շրջանում՝ մաթեմատիկայից և բնագիտական առարկաներից, 4 տարին մեկ: Հետազոտությունը տևում է 4 տարի։ Հայաստանը մասնակցել է TIMSS-ի 6 հետազոտությունների, 4-րդ դասարանցիների ներգրավմամբ։

Ժաննա Անդրեասյանը, ըստ հաղորդագրության, ասել է. «TIMSS հետազոտության տվյալները օգտակար են որոշումների կայացման և քաղաքականության մշակման համար, քանի որ մի կողմից օգնում են ավելի լավ պատկերացնել իրավիճակը, նաև տալիս են հնարավորություն՝ դրանք կիրառելու կրթության որակի բարելավմանն ուղղված մեր աշխատանքում»:

Ժաննա Անդրեասյանը տեղեկացրել է, որ այս տարի մեր երկիրը մասնակցելու է նաև PISA հետազոտությանը:

ԳԹԿ փոխտնօրեն, TIMSS հետազոտության ազգային համակարգող Արսեն Բաղդասարյանը նշել է. «Հայաստանի արդյունքների միտումները մաթեմատիկայից բավականին բարելավված են․ միջազգային միջին 502-ից մեր դպրոցականներն ապահովել են 513 միավոր։ Աղջիկների ու տղաների տվյալները գրեթե հավասար են։ Բնագիտական առարկաների ցուցանիշները դեռ զիջում են․ միջազգային միջինը 494 է, մեր երկրի տվյալը՝ 457»,- նշել է Արսեն Բաղդասարյանը։

TIMSS հետազոտություններում, ըստ Արսեն Բաղդասարյանի, կիրառվում է նաև չորս հարցաշար՝ ուսուցիչների, աշակերտների, տնօրենների և ծնողների համար։ Աշակերտներին վերաբերող հարցաշարերը երեխայի՝ դպրոցում ինտեգրման, բուլինգի դեպքերի, մաթեմատիկայի նկատմամբ վերաբերմունքի և անվտանգության ու կարգապահության մասին են։

Ժաննա Անդրեասյանն ընդգծել է, որ բնագիտական առարկաների ուսուցման և դասավանդման խնդիրները հասկանալու համար առանձին ուսումնասիրություն է պետք. «Տվյալների վերլուծության արդյունքում պետք է հստակ առաջարկներ ներկայացվեն»,- ասել է նախարարը։

Առաջարկ է եղել՝ քննարկել TIMSS հետազոտություններում 8-րդ դասարանի մասնակցության հարցը։