Այսօր Փարիզում՝ ՅՈՒՆԵՍԿՕ-ի կենտրոնակայանում, կմեկնարկի «Կրթության վերափոխման գագաթնաժողով+4» (Transforming Education Summit +4) բարձրաստիճան քննարկումը, որի ընթացքում կամփոփվի 2022 թվականի Կրթության վերափոխման գագաթնաժողովից հետո արձանագրված առաջընթացը և կքննարկվեն մինչև 2030 թվականը կրթական համակարգերի վերափոխման առաջնահերթությունները։ Քննարկումների առանցքում կլինեն կրթության որակի բարձրացման, ուսուցիչների, թվային կրթության, կրթության ֆինանսավորման և արհեստական բանականության կիրառման հարցերը։

Միջոցառմանը մասնակցելու նպատակով ՀՀ կրթության, գիտության, մշակույթի և սպորտի նախարար Ժաննա Անդրեասյանը հուլիսի 8–11-ը պաշտոնական այցով գտնվում է Ֆրանսիայում։ Գագաթնաժողովի շրջանակում նա զեկույցով հանդես կգա «Վերափոխելով կրթությունը. գագաթնաժողովի գլոբալ նախաձեռնությունների ձեռքբերումները և դրանց նշանակությունը 2030 թվականից հետո» խորագրով պանելային քննարկմանը։

Ժաննա Անդրեասյանն երեկ հանդիպել է Ֆրանսիայի մշակույթի նախարար Կատրին Պեգարի հետ։ Կողմերը քննարկել են Հայաստան–Ֆրանսիա մշակութային համագործակցության զարգացման հեռանկարները, անդրադարձել Լուվրի թանգարանի և Հայաստանի պատմության թանգարանի համատեղ ծրագրերին, ինչպես նաև Ֆրանկոֆոնիայի շրջանակում համագործակցությանը։ Ժաննա Անդրեասյանը նշել է, որ 2027 թվականին Երևանը կհյուրընկալի Ֆրանկոֆոնիայի մշակույթի նախարարների համաժողովը, իսկ ֆրանսիական կողմը վերահաստատել է մշակույթի ոլորտում համագործակցությունը շարունակելու պատրաստակամությունը։