Անցած 3 տարում կրթական հաստատությունների վերաբերյալ Կրթության տեսչական մարմնին հասցեագրված բողոքների թիվն արձանագրել է կտրուկ աճ:

Եթե 2022 թվականին Կրթության տեսչական մարմինը ստացել է 63 դիմում-բողոք 38 ուսումնական հաստատությունների գործունեության վերաբերյալ, ապա 2023-ին՝ 66 դիմում-բողոք 47 ուսումնական հաստատությունների գործունեության վերաբերյալ: 2024-ին, ըստ տեսչական մարմնի հաշվետվության, գրանցվել է 138 դիմում-բողոք 131 ուսումնական հաստատությունների գործունեության վերաբերյալ:

Տեսչական մարմնի տարեկան հաշվետվությունների համաձայն, բողոքներն առավել հաճախ վերաբերել են տնօրենի թույլ տված անօրինականություններին և անարդյունավետ աշխատանքին:

2024 թվականին, ըստ հաշվետվության, բողոքների 59.4%-ը (82 դիմում) վերաբերել են ուսումնական հաստատութան տնօրենի թույլ տված անօրինականություններին և անարդյունավետ աշխատանքին, իսկ բուլինգի վերաբերյալ դեպքերի մասին դիմումները եղել են 17.3%-ը: Դպրոցի բարոյահոգեբանական մթնոլորտի վերաբերյալ դիմումները եղել են ընդհանուր բողոքների 10 % -ը (14 դիմում):

2022 թվականից ի վեր արձանագրված այս պատկերն ուշագրավ է հատկապես այն առումով, որ սկսած 2021 թվականից հանրակրթության բյուջեն անշեղորեն աճել է հանուն կրթական «բարեփոխումների»: Տես գծապատկերը։

2021 թվականին կրթության ոլորտին հատկացվել է 159.6 մլրդ դրամ։ Այս ցուցանիշը հաջորդ տարիներին աճել է՝ 2022-ին դառնալով 181.6 մլրդ դրամ, 2023-ին՝ 198.7 մլրդ դրամ։ 2024 թվականին կրթության բյուջեն հասել է նախորդ տարիների համեմատ առավելագույն ցուցանիշի՝ 316,8 մլրդ դրամի։