Ուկրաինայում հունվարին ուսուցիչների աշխատավարձի բարձրացումից հետո վարձատրության բարելավման հաջորդ փուլը նախատեսված է սեպտեմբերին։ Այս մասին «Ապագայի ուսուցիչներ 2026» փառատոնի ժամանակ հայտնել է Ուկրաինայի կրթության և գիտության նախարար Օկսեն Լիսովային։

Նրա խոսքով՝ Լիսովայի խոսքով՝ 2026 թվականին աշխատավարձերի բարձրացումն իրականացվում է երկու փուլով․ հունվարի 1-ից պետական և համայնքային կրթական հաստատությունների մանկավարժների պաշտոնային դրույքաչափերը բարձրացել են 30%-ով, իսկ սեպտեմբերի 1-ից նախատեսվում է լրացուցիչ 20% աճ։

Ըստ նախարարի, լայնածավալ պատերազմի արդեն հինգերորդ տարում կրթական համակարգը շարունակում է գործել առաջին հերթին ուսուցիչների նվիրվածության շնորհիվ։

«Գրեթե 400 հազար մանկավարժ ամեն օր դասավանդում է ավելի քան 3,7 միլիոն երեխայի՝ չափազանց բարդ պայմաններում», – գնահատել է նախարարը։

Լիսովային ընդգծել է, որ ուսուցիչներն ու կրթության ոլորտի ղեկավարները շարունակում են աշխատել օդային տագնապների, էլեկտրաէներգիայի անջատումների և հարկադիր տեղահանությունների պայմաններում։ «Պետության խնդիրն է ուսուցչի նկատմամբ լինել նույնքան պատասխանատու, որքան ուսուցիչն է այսօր իր աշակերտների նկատմամբ», – ասել է նախարարը։

Նախարարը հատուկ շեշտել է, որ ուսուցիչների համար կարևոր է ոչ միայն վարձատրության բարձրացումը, այլև մասնագիտական զարգացման հնարավորությունը։ Այդ նպատակով գործում է «Vector» հարթակը, որտեղ արդեն գրանցվել է ավելի քան 100 հազար օգտատեր։

Կրթության նախարարն ընդգծել է նաև, որ այժմ հիմնական նպատակը ոչ թե կրթական բարեփոխումների անհրաժեշտության շուրջ բանավիճելն է, այլ դրանց որակյալ իրականացումը։

Նրա խոսքով՝ խորհրդարանը, տեղական ինքնակառավարման մարմինները, կրթության կառավարման պատասխանատուները և ուսուցիչները պետք է ավարտին հասցնեն ավագ դպրոցների ցանցի ձևավորումը, հաշվի առնեն փորձնական ծրագրերի արդյունքները և շարունակեն ներդրումներ կատարել կրթական ենթակառուցվածքներում։