ՀՀ վարչական դատարանի դատավոր Լիլիթ Սադոյանն այսօր որոշել է բավարարել «Հայ ասպետ» կրթադաստիարակչական բարեգործական հիմնադրամի հայցը և ճանաչել ՀՀ ԿԳՄՍ նախարարի 2023 թ. Օգոստոսի 3-ի որոշման մեջ փոփոխություններ կատարելու հրամանի ընդունման հետևանքով ծագած իրավահարաբերությունների բացակայությունը: Դատարանը որոշել է նախարարությունից բռնագանձել 10. 000 դրամ որպես պետական տուրք:

«Այլընտրանքային տարբերակ»

Մարտի 19-ին դատարան դիմած փաստաբաններից Արա Զոհրաբյանը Ֆեյսբուք սոցիալական ցանցում գրել է. «Ինչպես հիշում եք, ՀՀ կրթության, գիտության, մշակույթի և սպորտի նախարարը (այսուհետ՝ նախարար) 7-րդ դասարանի Հայ Ժողովրդի պատմության երկու դասագիրք էր երաշխավորել գործածության: Մեկը Աշոտ Ղուկասյանի և Ա․Տերյանի հեղինակած «Հայոց պատմություն» դասագիրքն էր (ԱՅՍՈՒՀԵՏ՝ ՂՈՒԿԱՍՅԱՆԻ ԴԱՍԱԳԻՐՔ), իսկ մյուսը՝ մեծ սկանդալ առաջացրած «Մասնակցային դպրոց» ԿՀ միջգիտակարգային նախագծի շրջանակում Ս.Հովհաննիսյանի հեղինակած «Հայոց պատմություն» դասագիրքը (ԱՅՍՈՒՀԵՏ՝ ՍԿԱՆԴԱԼԱՅԻՆ ԴԱՍԱԳԻՐՔ):

Նախարարը, տեսնելով հանրության և մասնագիտացված շրջանակի խիստ բացասական արձագանքը սկանդալային դասագրքի վերաբերյալ և հասկանալով, որ դպրոցները և ուսուցիչները այդ երկու դասագրքերից սկանդալային դասագիրքը չեն կիրառի, խորամանկ և անօրինական քայլի է գնում: Չունենալով դրա իրավունքը, արդեն իսկ հաստատված Ղուկասյանի դասագիրքը ներկայացրել է կրկնակի փորձաքննության և հրամանով հանել է գործածությունից՝ դպրոցների և ուսուցիչների համար թողնելով միայն մեկ տարբերակ՝ Սկանդալային դասագիրքը:

Կարին Տոնոյանի ղեկավարած Հայ Ասպետ դպրոցի և ուսուցչի միջոցով, փաստաբաններ Սիմոն Բաբայանի և Մանե Կարապետյանի հետ միասին հայց ենք ներկայացրել ՀՀ վարչական դատարան:

ՀՀ Վարչական դատարանը՝ դատավոր Լիլիթ Սադոյանի նախագահությամբ, քննել է նշված գործը և այսօր՝ 2024թ. հոկտեմբերի 15-ին, մեր հայցը բավարարել է:

Դատարանը վճռել է ճանաչել Ղուկասյանի դասագիրքը գործածությունից դուրս թողած նախարարի հրամանի ընդունման արդյունքում ծագած իրավահարաբերության բացակայությունը:

Դատարանի վճռի օրինական ուժի մեջ մտնելու պահից դպրոցները և ուսուցիչները կունենան 7-րդ դասարանի Հայոց պատմություն դասագրքի այլընտրանքային տարբերակ»:

ՀՀ ԿԳՄՍ նախարար Ժաննա Անդրեասյանը փետրվարի 28-ին հայտարարել էր. «Հայոց պատմության» 7-րդ դասարանի դասագիրքը շրջանառությունից հանելու մասին որևէ խոսք չկա»: Նախարարը նաև ավելացրել էր. «Դասագիրքը մնում է շրջանառության մեջ և դրանում պետք է կարգավորվեն այն խնդիրները, որոնք բարձրացված են և մենք բոլոր անհրաժեշտ փուլերով անցել ենք»:

«Հայոց պատմության» դասագրքի վերաբերյալ դժգոհություն էին հայտնել պատմաբաններ ու փորձագետներ։ Նախարարությունը կազմակերպել էր հանդիպում-քննարկում։ Նախարարությունը խնդրել էր նաև 3-րդ կողմի տեսակետը։ Տարբեր կարծիքների վերլուծությունից հետո նախարարությունը որոշեց, որ սխալները կուղղվեն, դասագիրքը կմնա աշակերտական սեղանին։

www.mediaforedu.am-ը պատրաստել է գրավոր հարցում՝ ուղղված ՀՀ ԿԳՄՍ նախարարությանը: Հետաքրքիր է ԿԳՄՍ նախարարության մեկնաբանությունը և մասնավորապես հարցը, թե բողոքարկելո՞ւ է արդյոք այս որոշումը:

Անուշ Մարտիրոսյան