Լուսանկարը՝ Զավեն Խաչիկյանի
Ոչ ֆորմալ կրթությունը գալիս է լրացնելու այն բացը, որն առկա է ֆորմալ կրթության բնագավառում, այն է՝ ազատ կամընտրություն, ստեղծագործական միջավայր, սխալվելու զրո հավանականություն և այլն։
Եթե ֆորմալ կրթակարգում կարևորագույն խնդիրներից է երեխաներին մոտիվացնելը, ապա ոչ ֆորմալ կրթությունը կազմակերպվում և իրականություն է դառնում հենց ինքնամոտիվացիայի հիմքով։
Թեպետ ֆորմալ կրթությունը կարևորում է համագործակցային հմտությունների զարգացումը, ստեղծագործական ունակության, նախաձեռնողականության խթանումը, բայց բովանդակային գերխիտ հագեցվածությունը, գնահատականի գործոնով պայմանավորված՝ սխալվելու անթույլատրելիությունը և պարտադրվող ծրագրերը այլ արդյունքների են հանգեցնում։ Դրան հակառակ՝ ոչ ֆորմալ կրթությունը զերծ է երեխայի ինքնադրսևորումը սահմանափակող գործոններից, ավելին, խթանում է ինքնադրսևորումը, լավ մտածված, նպատակային ծրագրերով և մեթոդներով կարող է զարգացնել ինքնաճանաչողությանը, ինքնակատարելագործմանը միտված հմտություններ, կարողություններ (կենտրոնանալու, լսելու, ապրումակցելու, դիտողական, ստեղծագործական և այլ)։
«Ստեղծագործարան» կրթական ծրագրի նպատակը Արցախից բռնի տեղահանված 6-14 տարեկան երեխաների սոցիալականացումն է․ մեթոդը՝ ոչ ֆորմալ կրթությունը։ Երբ անձի ձևավորման համար չափազանց կարևոր առողջ միջավայրը խաթարվում է երեխայի աշխարհ ներխուժած արատավոր, տգեղ, նույնիսկ սարսափելի երևույթներով, համառ, երկարատև աշխատանք է պետք՝ վերականգնելու համար աշխարհի հանդեպ երեխայի առողջ հայացքը։ Ոչ ֆորմալ կրթական միջավայրը նպաստավոր կարող է լինել այդ գործում։
«Մեդիան հանուն կրթության» ՀԿ համահիմնադիր, ուսուցիչ
