Լուսանկարը՝ ՄԱԿ -ի պաշտոնական կայքից
«Լրագրողներ առանց սահմանների» միջազգային կազմակերպությունը դժգոհություն է հայտնել Նյու Յորքում ՄԱԿ-ի Ապագայի գագաթաժողովի շրջանակներում ընդունված բանաձևի կապակցությամբ։
Հեղինակավոր կազմակերպությունը նկատում է, որ սեպտեմբերի 22-ին ընդունված բանաձևը չի պարունակում որևէ նշանակալի դիտարկում, չի անդրադառնում 21-րդ դարի համընդհանուր տեղեկացվածության և լրագրողների իրավունքների պաշտպանությանը, անտեսում է խնդիրները։
«Լրագրողներ առանց սահմանների» կազմակերպությունը հայտարարում է, որ գագաթաժողովից ակնկալած հավաստի, անկախ ու բազմակողմանի տեղեկատվության հասանելիության նպատակով անհրաժեշտ շեշտադրումների փոխարեն նշված են ընդհանրական ձևակերպումներ։ Մինչդեռ գագաթաժողովի բանաձևը կարող էր լինել հիմք կայուն զարգացման նպատակների համատեքստում։
Ըստ լրագրողական կազմակերպության, ընդունված փաստաթղթի ուժով հնարավոր չէ իրականացնել ներառական, բաց, կայուն, ապահով և անվտանգ թվային տեղեկատվության ռազմավարություն։
Փաստաթղթի վերաբերյալ դժգոհություններ հայտնելուց բացի, միջազգային լրագրողական կազմակերպությունը հայտարարում է, որ համագործակցում է կառավարությունների, գործընկերների հետ, որպեսզի հնարավոր լինի նպաստել անկախ, հավաստի և բազմակողմանի տեղեկատվության ապահովմանը՝ ամբողջ աշխարհում։
