Մեծ Բրիտանիայի Սաֆոլք շրջանի Սենթ Գրեգորիի տարրական դպրոցի շուրջ 50 աշակերտների համար դպրոցական էքսկուրսիան Լոնդոն վերածվել է անմոռանալի անակնկալի․ նրանք հանդիպել են հոլիվուդյան դերասան Դուեյն Ջոնսոնին։

3-րդ և 4-րդ դասարանների աշակերտները մեկնել էին Լոնդոն՝ մասնակցելու «Մոանա» ֆիլմին նվիրված ինտերակտիվ միջոցառմանը։ Երեխաներին դիմավորել է ֆիլմում Մաուիի կերպարը մարմնավորող դերասանը։

Այս հանդիպումը նախապես կազմակերպվել էր «Դիսնեյ»-ի և դպրոցի տնօրենի համագործակցությամբ։

Նախապատմությունը սկսվել էր դեռ հունվարին, երբ աշակերտները սոցիալական ցանցերում տեսանյութ էին հրապարակել՝ փորձելով գրավել Դուեյն Ջոնսոնի ուշադրությունը։ Տեսանյութը մեծ տարածում էր ստացել, և դերասանը տեսաուղերձով պատասխանել էր երեխաներին։

Նա խոստացել էր ամբողջությամբ վարձակալել կինոդահլիճ, որպեսզի աշակերտները, նրանց ընտանիքների անդամներն ու ընկերները միասին դիտեն «Մոանա»-ի նոր ֆիլմը։ Դերասանը հայտնել էր, որ կվճարի նաև երեխաների քաղցրավենիքի և խորտիկների համար։

Լոնդոնում կազմակերպված միջոցառման ընթացքում Դուեյն Ջոնսոնը անձամբ հանդիպել է երեխաներին, զրուցել նրանց հետ, լուսանկարվել և ժամանակ անցկացրել յուրաքանչյուրի հետ։

«Նրանց հետ հանդիպելը հրաշալի էր։ Նրանք պարզապես երջանկությունից խելքահան էին եղել։ Հանրաճանաչ լինելու ամենահաճելի կողմը հենց այսպիսի պահերն են։ Դրանք իսկապես կարևոր են», – BBC-ին ասել է դերասանը։

Դպրոցի տնօրեն Դենիել Վուդրոուն նշել է, որ երեխաներն ամբողջ օրը նույնիսկ չէին կասկածում, թե ինչ անակնկալ է սպասվում։ Աշակերտներից մեկը հանդիպումն անվանել է «կյանքի լավագույն օրը»՝ պատմելով, որ երբ դերասանը հայտնվել է իրենց առջև, բոլորը մի պահ պարզապես խոսելու ունակությունը կորցրել էին։