«Կրթության որակի ապահովում» ծրագիրը ներառում է ուսուցիչների վերապատրաստմանն ուղղված մի շարք միջոցառումներ, որոնց նպատակն, ըստ պաշտոնական ձևակերպումների, հանրակրթական հաստատություններում աշխատող մանկավարժների մասնագիտական աճի ապահովումն է։

Վերջին տարիներին ուսուցիչների վերապատրաստման գործընթացի կազմակերպման և իրականացման համար բյուջետային հատկացումները փոփոխվել են՝ երբեմն զգալի աճ արձանագրելով, որոշ դեպքերում՝ նվազելով։

Մասնավորապես, 2021-2024 թվականներին իրականացված և 2025 – ին նախատեսվող ֆինանսավորումն ուղղված է ինչպես հանրակրթական հիմնական ծրագրեր իրականացնող ուսումնական հաստատությունների ուսուցիչների ատեստավորմանն ու վերապատրաստմանը, այնպես էլ ԳՏՃՄ (գիտություն, տեխնոլոգիա, ճարտարագիտություն, մաթեմատիկա) առարկաներ դասավանդող մանկավարժների մասնագիտական զարգացմանը։

«Կրթության որակի ապահովում» ծրագրում իրականցվում են ուսուցիչների վերապատրաստումներին ուղղված միջոցառումներ։

«Հանրակրթական հիմնական ծրագրեր իրականացնող ուսումնական հաստատությունների հերթական ատեստավորման ենթակա ուսուցչի վերապատրաստում» միջոցառումը ներդրվել է 2021 թվականից։

Կարգ

Ըստ ՀՀ կառավարության 28 ապրիլի 2022 թվականի N 582-Ն որոշման՝ ուսումնական հաստատության՝ հերթական ատեստավորման ենթակա ուսուցչի վերապատրաստումը պարտադիր է և անցկացվում է տնօրենի հաստատած հերթական ատեստավորման ժամանակացույցին համապատասխան։

Հանրակրթական հիմնական ծրագրեր իրականացնող ուսումնական հաստատությունների հերթական ատեստավորման ենթակա ուսուցիչների վերապատրաստման գործընթացի կազմակերպման և իրականացման համար ուղղված բյուջետային ֆինանսավորումը 2021-2025 թվականներին արձանագրել է ինչպես աճ, այնպես էլ նվազում: Տե՛ս գծապատկեր 1-ը:

Պատկեր 1-ից երևում է, որ 2022 թվականի ֆինանսավորումը 80,1%-ով աճել է, 2023 թվականին 26,9%-ով նվազել է, 2024-ին նվազել է 63,2%-ով, 2025-ի համար նախատեսված ֆինանսավորումը 2024-ի չափով է։

Ըստ բյուջետային փաստաթղթերի, 2021 թվականի վերապատրաստումներին մասնակցել է 6870 ուսուցիչ, 2022 -ին՝ 11124, 2023 թվականին՝ 7458, 2024-ին՝ 2085, իսկ 2025 թվականին նախատեսված է 3000 ուսուցչի վերապատրաստում։

Պաշտոնական տվյալներով, 2022 թվականին վերապատրաստված մանկավարժական աշխատողները 954-ն են, 2023 թվականին՝ 876, 2024-ին՝ 915, իսկ 2025 թվականին նախատեսված է վերապատրաստել 1317 մանկավարժական աշխատողի։

Ուսուցիչը վերապատրաստումներին մասնակցելու նպատակով, ըստ նախարարի 2020 թվականի սեպտեմբերի 7-ի N 1162-Ա/2 հրամանով հաստատված ծրագրի, ընտրում է վերապատրաստող կազմակերպությունը և (կամ) դասընթացը:

ԳՏՃՄ առարկաներ

2024 թվականից ներդրվել է «ՀՀ պետական դպրոցների ԳՏՃՄ առարկաներ դասավանդող ուսուցիչների վերապատրաստում` նոր ստանդարտներին համապատասխան» միջոցառումը։ Նպատակն է ՀՀ Արարատի, Գեղարքունիքի և Կոտայքի մարզերի դպրոցների ԳՏՃՄ առարկաներ դասավանդող ուսուցիչների վերապատրաստումը՝ նոր ստանդարտներով։

Վերապատրաստման նպատակով 2024 թվականին պետական բյուջեից ուղղվել է 87,4 մլն դրամ, իսկ 2025 թվականին նախատեսված է 138,6 մլն դրամ. Ծախսն աճել է 58,6%-ով։

2024 թվականին ԳՏՃՄ առարկաներ դասավանդող վերապատրաստված ուսուցիչները 375 -ն ն, իսկ 2025-ին նախատեսված է 1765 ուսուցչի վերապատրաստում։

Սփյուռքի ուսուցիչներ

«Կրթության, մշակույթի և սպորտի ոլորտներում միջազգային և սփյուռքի հետ համագործակցության զարգացում» ծրագրի «Սփյուռքի կրթօջախների ուսուցիչների կարողությունների հզորացում» միջոցառումն ուղղված է ուսուցիչների վերապատրաստմանը՝ մասնագիտական առանձին ուղղություններով։ Ֆինանսավորումն աճել է 2021-2025 թվականներին։ Տե՛ս գծապատկեր 2:

Այս ծրագրով 2022 թվականին վերապատրաստվել է 25 ուսուցիչ, 2023-ին՝ 69, 2024-ին՝ 60, 2025 թվականին նախատեսվում է 70 ուսուցչի վերապատրաստում։ Վերապատրաստումներն իրականցվում են առկա կամ հեռավար եղանակներով։

Էլենա Հարությունյան