2015 թվականին ՄԱԿ-ի գլխավոր քարտուղարությունը Նյու Յորքում ընդունեց «Վերափոխենք աշխարհը. կայուն զարգացման օրակարգ -2030» բանաձևը: Այն ներառում է կայուն զարգացման 17 նպատակ: Բանաձևի ընդունման հիմքում գլոբալ մարտահրավերների՝ աղքատությանը, անհավասարությանը, կլիմայական փոփոխությունների հաղթահարմանը նպաստելն է:

17 նպատակների շարքում էական նշանակություն ունի Կայուն զարգացման 4-րդ նպատակը՝ բոլորին հասանելի որակյալ կրթության և շարունակական կրթության ապահովումը։

Բոլորին հասանելի որակյալ կրթության և շարունակական կրթության ապահովումը նշանակում է, որ այս բանաձևի հիմքով ազգային մակարդակով համապատասխան քայլեր ձեռնարկած երկրները պետք է հիմք ընդունեն միջազգայնորեն հաստատված առաջնահերթությունները՝

Բոլորին հասանելի որակյալ կրթություն ապահովելու հավակնոտ նպատակներին հասնելու համար անհրաժեշտ է գլոբալ համագործակցություն, հստակ քաղաքականություն և զգալի ռեսուրսների տրամադրում:

ՅՈՒՆԵՍԿՕ-ն, ՅՈՒՆԻՍԵՖ-ը և Համաշխարհային բանկը կարևոր դեր ունեն այս նպատակներին հասնելու ջանքերում: Միջազգային հեղինակավոր կազմակերպությունները ներկայացնում են քաղաքականության առաջարկներ, ֆինանսավորում և տեխնիկական աջակցություն:

Քաղաքականություն

ՅՈՒՆԵՍԿՕ-ն, որպես բոլորի համար հասանելի որակյալ կրթության քաղաքականությունն ազդարարող առաջատար կազմակերպություն, մշակում է ծրագրեր: 2015-ին հաստատվել է Կրթություն -2030. գործողությունների շրջանակը, որը կառավարություններին ուղղորդում է կայուն զարգացման 4-րդ նպատակն ազգային ռազմավարությունների վերածելու հարցում: ՅՈՒՆԵՍԿՕ-ն նաև իրականացնում է գլոբալ մշտադիտարկում՝ Գլոբալ կրթության մոնիտորինգի հաշվետվության միջոցով՝ ընդգծելով երկրների առաջընթացը, մարտահրավերներն ու լավագույն փորձը:

Ֆինանսավորում

ՅՈՒՆԻՍԵՖ-ը և Համաշխարհային բանկը ռեսուրսներ են ներդնում՝ տարբեր երկրների կրթական նախաձեռնությունների իրականացմանն աջակցելու համար: ՅՈՒՆԻՍԵՖ-ը կենտրոնանում է այն ծրագրերի ֆինանսավորման վրա, որոնք ապահովում են կրթության հասանելիությունը խոցելի խմբերի համար (ներառյալ աղջիկների և հակամարտությունների գոտիների երեխաների կրթությունը):

Համաշխարհային բանկը Միջազգային զարգացման ընկերակցության միջոցով տրամադրում է վարկեր և դրամաշնորհներ դպրոցներ կառուցելու, ուսուցիչներ պատրաստելու և ուսման արդյունքները բարելավելու համար։

Տեխնիկական աջակցություն

Միջազգային կազմակերպությունները նաև առաջարկում են տեխնիկական ու փորձագիտական աջակցություն՝ կրթական համակարգերի ամրապնդման համար: Օրինակ, ՅՈՒՆԵՍԿՕ-ն աջակցում է ուսումնական ծրագրերի մշակմանը, ուսուցիչների վերապատրաստմանը և կրթական համակարգերում կայուն զարգացման ինտեգրմանը:

ՅՈՒՆԻՍԵՖ-ը համագործակցում է կառավարությունների հետ՝ ներառական կրթության ռազմավարություններ մշակելու համար:

Համաշխարհային բանկը տրամադրում է տվյալների վերլուծություն և քաղաքականության վերաբերյալ խորհրդատվություն՝ կրթության ոլորտի պլանավորումն ու կառավարումն արդյունավետ դարձնելու նպատակով:

Նշված կազմակերպությունները ձևավորում են գլոբալ աջակցության համակարգ, որը երկրներին հնարավորություն է տալիս հաղթահարել կայուն զագացման 4-րդ նպատակին հասնելու խոչընդոտները: Համագործակցությունը երաշխավորում է, որ երկրները հասանելիություն ունենան այն գործիքներին, գիտելիքներին և ֆինանսական ռեսուրսներին, որոնք անհրաժեշտ են որակյալ կրթություն ապահովելու համար:

Համաշխարհային կազմակերպությունների ներդրած ջանքերի պայմաններում ինչպե՞ս են ԵՄ՝ առաջատար կրթական համակարգ ունեցող երկրներն արձագանքում Կրթություն-2030. գործողությունների շրջանակին՝ հաջորդիվ:

Լիլիթ Ավագյան