mediaforedu.am-ը կրկնակի հարցման շնորհիվ ստացել է նոր տվյալներ՝ ԿԳՄՍ նախարարության պատասխան գրությամբ, 2023-2024 թթ․ նոր չափորոշչին համապատասխան դասագրքերի ստեղծման բյուջետային հատկացումների, դասագրքերի քանակի, գնահատման հանձնաժողովների անդամների թվի և հանձնաժողովների ծախսերի վերաբերյալ:

Դասագրքերի գնահատման հանձնաժողովի կազմավորման և գործունեության իրականցման համար ուղղված ֆիանանսավորման տվյալներ չկան պետական բյուջեի հավելվածներում: Ուստի, mediaforedu.am-ը դիմել է նախարարություն՝ առաջին հարցմամբ ստանալով միայն հայցվող տեղեկության մի մասը:

Ըստ կրկնակի հարցման պատասխանի, «Հանրակրթություն» ծրագրի «Կրթական հաստատությունների աշակերտներին դասագրքերով և ուսումնական գրականությամբ ապահովում» միջոցառման շրջանակում նոր չափորոշչին համապատասխան դասագրքերի ստեղծման նպատակով 2023-2024 թթ․-ին իրականցված դրամաշնորհային մրցույթների հիմքով 2023 թվականին դասագրքեր ստեղծող կազմակերպություններին և ֆիզիկական անձանց պետբյուջեի միջոցներից, որպես դրամաշնորհ, վճարվել է 340․5 մլն դրամ:

2-րդ դասարան

Տպագրվել է 2-րդ դասարանի 384283 օրինակ դասագիրք, որի համար տպարաններին պետբյուջեից վճարվել է 232․3 մլն դրամ: Նշված դասագրքերի փորձաքննությունն իրականացվել է սահմանված կարգով՝ ըստ առարկաների 8 հոգուց ձևավորված փորձագիտական հանձնաժողովների կողմից: Փորձաքննության ավարտից հետո փորձագետներին պետբյուջեից վճարվել է 84․3 մլն դրամ»,- տեղեկացրել է նախարարությունը:

Ըստ պաշտոնական պատասխանի, «Փորձաքննությունից հետո 42 անուն դասագիրք երաշխավորվել են գործածության համար։ 2024 թվականին նոր դասագրքեր ստեղծող կազմակերպություններին և ֆիզիկական անձանց պետբյուջեի միջոցներից, որպես դրամաշնորհ, վճարվել է 478․2 մլն դրամ»:

3-րդ և 4-րդ դասարան

ԿԳՄՍ նախարարությունը նաև տեղեկացրել է, որ «Տպագրվել է 3-րդ դասարանի 445167 օրինակ դասագիրք, որի համար տպարաններին պետբյուջեից վճարվել է 282․4 մլն դրամ: Դասագրքերի փորձաքննության գործընթացն իրականացնելու նպատակով կնքվել են 3 պայմանագրեր՝ համապատասխանաբար «Խ.Աբովյանի անվան հայկական պետական մանկավարժական համալսարան», «Երևանի պետական համալսարան» և «Վ. Բրյուսովի անվան պետական համալսարան» հիմնադրամների հետ։ Գործընթացը կազմակերպելու և համապատասխան մասնագետներին, փորձագետներին, վարձատրելու նպատակով, կնքվել են պայմանագրեր 88․4 մլն դրամ: 53 անուն դասագիրք երաշխավորվել է»։

Չամփոփված արդյունքներ

2023-2024 թվականներին 4-րդ, 9-րդ դասարանների դասագրքեր չեն ստեղծվել, իսկ 1-ին, 4-րդ, 9-րդ, 11-12-րդ դասարանների դասագրքերի 2025 թվականի փորձաքննության արդյունքներն ամփոփված չեն, – տեղեկացնում է նախարարությունը և հայտնում, որ 5-12-րդ դասարանների դասագրքերի տպագրական աշխատանքների կազմակերպումն իրականացնում է «Դասագրքերի և տեղեկատվական հաղորդակցման տեխնոլոգիաների շրջանառու հիմնադրամը»։